Murge noar n angere camping

De letste oavend alweer hie oppe camping. We hubbe os vermaakt mit Marta van 76 joar wat hie de scepter zwaait. Good te mirke datse oet t communistisch regiem kumpt. Ze moos op sjool nog russisch lere vertelde ze. 

Ze heat qua postuur veual weg van Oma Lieke, alein is ze nog get veerkanter en ze heat bienoa geine nek. We houe de recensies al geleaze dus we wore veurbereid.

Wie we gistermiddig aan keme rieje keem ze al op os aaf gesjtiefeld mit grote passe. Die heat gein sjtappe teller neudig, miljaar die lupt mich get aaf op inne daag.

In gebrekkig Duits, wat overigens good te volgen is, weesze os wo we de camper mooste parkeren. Hienter dea auto, oent vrouw moes helfen. 

Jawool! Ich sjtap geliek oet de camper en woos eigenlijk neet wat ich moos helfen. Wielke kint dat good zevvels huur. 

Camper geparkeerd en mer noar de receptie lope, doa zoot ze mit n angere gast te sjrieve, we durfde nog neet noar binnen te goan. Echt gek huur, mer ze heat get euver zich datse dich bienoa neet durfs te beweage.

Sjienbaar wore net veur os italianen aangekomen die leepe auch al noar de receptie, ich dacht lekker puh, wea zeen eerst aan de beurt. Mer Marta keem al noar boete gelope wie ze os zoog sjtoan mit os veere.

Ge zuruck noar de camper er zeen nog 3 veur oig die zeen gerade an gekome. Ich roefe waal ! Wea drope aaf ......dan mer alvast lunche. Wea ligge mit de deur richting t hoes van Marta en die zuut alles jong! En hur man loog op n ligsjtool te dutte veur t hoes. Als zie smiddigs geit sloape ( anders trikt ze t neet), dan hilt hea de wacht, hea hoempelt auch n bietje (veual), 

Ich zoog hur sjtoan en winkte dat we eraan keeme, nea doot mer rustig aan dee ze mit dat vleizig ermke. 

Kom zeat Wiel, dan hubbe we t gehad. Bordjes ff in de camper gezat en wea noar hur keamerke, nondepiekes doa meurde t. Noar wat ? Kin t neet toes bringe, oud, euver de datum.....hahaha ich vroag net aan Wiel wie rook t doa eigenlijk hea zeat geliek, noa ouw luuj.

Ich weer geliek truuk gesjtuurd want ze moos van os alletwee os paspoorten hubbe. Computer hou ze neet, eigenlijk woor t n soort kamer wo we zote, zo’n ram ouderwetse kamer mit van die antieke sjteul en banke. 

ID aafgegeave en ich kreeg bleadjes in mien heng geduuwd. Lezen biete.....en ongertussje sjreef zie os in wat we beiden moosten ongertekene. Op die bleadjes wat we beide mooste leaze sjting de informatie euver de camping en de wifi code en mit welke bus we kooste goan noar de sjtad. 

Dat woor dus die 6 bleadjes wo ze zich euver bedoon in de revieuws, bietje euverdreve, ich kin mich veurstelle dat t best vermuijend veur hur is als ze dit telkens mos oetlegge. 

Omdat we gein sjtroom neudig houe mochten we doa blieve sjtoan.  Ze leep nog ff mit os mit noar de poort om te vertille wo de sjleutel hingt veur als we later dan 8 oer toes kome en ongertussje is ze hongaars mit hur man aan t kalle, dea wiest net zo mit zien oud ermke . Zeat ze teage os, das iest de generaal dea zeat do dis oent doe das, dea kan alain mer commandieren hahaha grappig, mosze huure weam t zeat, hea moes koche aber das iest ain catastrofe, ich moes alles zelber machen. Die passen good bie ein.

Noa de lunch zeen we mit de bus noar Pecs gegange, noar t grote winkelcentrum, doa woor t lekker keul in, lekker weer ns ff sjnuffele in de winkels, mer volgens mich houe ze van de bekende merken alles opgekocht wat neet meer werd verkocht. Ram oet de tied. Geuf niks t woor ff gezellig.

Wiel hou zin in mc donalds dat hubbe we doa nog lekker gegeate, boa dat sjmaakte, friet wore ns n keer good werm en de bic mac woor n ouderwetse, echt wie dr vreuger in t begin woor, tegenwoordig kriegse de bic mac neet meer in dien bakkes, zo diek is dea gewore, en dit woor echt de ouderwetse, auch qua sjmaak van vreuger. Goddelijk! 

Wie we truuk bie de camper keeme, woor t hie highlife. Commandantje hou t mer druk ermit. Ze leep heen en weer te commanderen. Wiel leep s middigs auch ff noar achter , euver n brukske doa zou nog n veldje zeen , om te kieke wat doa woor. Mit de sjtaart tussje zien bein keem dr truuk gelope, Marta woor doa net toevallig, hea moog doa neet kome, doa loge de tenten mit groepen jongeren. Weg wees....

Dus teage de oavend mooste die jongeren douche en dat moog hie mer 3 tot 5 minuten. Er zeen hie veur de jongens 2 douches en veur de vrouwe 2 douches. Eingelijk ein grote ruimte mit twee douchebakke neave ein mit n gordien erveur.

Marta bleef in de gang sjtoan om alles in de gaten te houe en te commanderen. Erm kinger.

Toen ging de buurman zien afvalzak wegbringe, hea werd truuk gefloten. Ze hoalde n plestiek flesj eroet en wiest noar m dat dr dea plat mot sjtampe en wiest noar de volgende plestiek flesj. Pak karton? Mot plat en bie t papier gelag.

Neave de camping likt de lidl, ich zik teage Wiel, ich drop mien afvalzak waal doa in de container.

Wiel ging aafwasse, zie lupt achter m aan. Auch dat gebeurt in n soort kamer mit n grote aanrecht, mit 2 sjpeulbakken, die bezat wore. Hea moos zien beurt wachten.

Twee Nederlanders wore aan t sjpeule, die zachte al, we gaan morgen naar de stad en dan vlug weg wezen hier, ik word gek van haar. 

Soms krege we auch ff de sjiet van hur, mer ze heat auch get aandoenlijks euver zich, ze maakt t zich veural zelf muielijk. 

We wore vanmiddig rond n oer of 4 weer toes, en hea (her generaal)loog op zien bedje boete te sjloape, Marta woor nurgens te bekinne, bun toch mer sjnel goan douche, mer ich woos neet wie sjnel ich kloar moos zeen, dacht telkens dat de deur oape ging en Marta keem kieke wat ich aan t doon woor.

Wie we vanoavend aan t afwasse wore, (we wore de enige), ging de deur oape, ich zik teage Wiel, is ze dr? Tuurlijk, ze keem ff kieke mer ze leep auch weer weg. Wiel ging alvast mit de aafwas noar de camper en ich zurgde dat ich de keuken spic oent span weer achter leet, en nondedjuu, ich zoog dr weer langs lope en hur mit n sjeive blik noar binne kieke.

Wiel is alvast goan betale en ze kint t sjienbaar good hubbe mit Wielke want hea bleef aardig lang weg. We hubbe ff gezellig gebabbeld zeat dr, ze vertelde dat ze gisteren stress hou gehad. Ze wilde gein groepen meer doon, mer die groepen jeugd mit hun leiders sjtingen s middigs  ineens op de camping zonger gereserveerd te hubben en ja, die kinger kinsze toch neet weg sjture in die hitte? Dus ondanks dat veerkante lief zonger nek, heat ze toch get leefs euver zich. 

Eine mit gebroeksaanwiezing (kump os bekint veur), Murge weer lekker verder.......