Ongerweag noa Puszta Eldorado

We zeen noe ongerweag noar os derde plekje. Bie t outlet hubbe we ff rondgeloupe, n mooi euverzichtelijk outlet mit weer angere winkels als bie os. Er woor zelfs n rituals, doa koos ich de verleiding neet weersjtoan om doa get te kaupe. T volk wat doa leep woor veur 95 % chineze, de parkeerplaats mit busse sjting vol, die motte toch pegels hubbe alsze zuus mit wat die veur n tesje lope....prada.....alein mer van die dure merken. 

Op de parkeerplaats hubbe we gelunsjt en zeen toen doorgereje noar camping Ave Natura, net neave Budapest.

N fijne plek gerund door moeder Marta en Zoon Gabor. Marta weerd in augustus 65 en zoon Gabor geit t dan mit zien vriendin euvernumme. Ze doon t toppie. Super vruntelijk, wille dich mit alles helpen. Gabor zuusze alein mer poetsen, takjes oprapen dea rent zich de bein onger de vot oet. De douches zeen ontzettend zuuver en zo ruum dat hub ich nog nurgens gezeen. Mit n douche, n wasbak, kins dien hoare fohne en zo lang onger de douche sjtoan alsze wils. Heerlijk! Tickets veur de bus kinsze er kriege en auch veur de hop onn busse.

We wore s oavens in de informatiemappen aan t kieke en kumpt n hollender langs, zijn jullie nederlanders? Ja? Wij hebben vandaag de hop onn hop off bus gedaan. Wat we eigenlijk helemoal neet van plan wore. Mer dea woor dr zo enthousiast euver aan t vertelle......

Ich hou toes alles oetgezocht wo we noar toe zouwe kinne goan, de nummers opgesjreve van de tram, welke boot t goedkoopste woor enz. 

Mer volgens hum woor dat t einde, veur 3 euro meer kinsze twee daag ermit reize en de eerste daag de gele lijn, de volgende daag de rode lijn. En de boottocht van 50 min. Zit doa auch in.

Ich weit wie leuk dat is, hub t mit de meisjes mit gemaakt in paries. Ving eigenlijk dat Wiel dat auch ns mot mit maken. Hea hou dr waal oere noar. Okay dan, doon we!

ff tussje door......

Wat hie in Hongarije super geregeld is dat volwassene vanaaf 65 joar gratis moge reizen. Dat moge ze in Nederland wat mig betreft auch goan inveure. De bussen zitte gezellig vol mit van die oudjes en wat ich super ving, eederein sjteit op als de bus vol is veur eemis wat ouder is. Of als dr eemis insjtapt mit n kleintje dragend op de erm. Doa werd ich toch ff blie van wie ich dat zoog, auch heel vruntelijk, elkaar groetend, elkaar helpend, doa kinne wea nog get van lere. Wiel woor aan t tanken mit n pas en t lukte m neet, geliek keam eemis vroage of dr koos helpen. fijn he? 

De volgende daag zeen we noar t bushokje gelopen, n kwarteerke vanaaaf de camping en binnen 20 minuutjes sjtinge we in t centrum van Budapest, wo auch de ‘huppelbus’ zou kome. Gein idee woarom mer volgens Wiel is t de huppelbus.

Mer good dat Marta smurgens nog ff get hou oetgelag anders bleeve wea wachten op n geale bus. Nea, alles rood mit versjillende lijnen, de rode of de geale lijn. Op de rode bus sjteit n giraffe, doa mooste we op lette.

Achteraaf gezeen woor die huppelbus gein succes. In de hele sjtad zeen ontelbare verkeerslichten, neet zoals bie os, nea die hange dich bienoa in de nek alsze hoog zits, hangend aan kabels te zjweije. Ongergrondse elektriciteit hubbe ze hie in Hongarije nog neet.

Gisteren onger t fietse leepe de luuj zelfs noar de euverkant van de sjtroat om water oet n pomp te tappe, doe wits echt neet watse zuus. Mien bakkes veel ervan oape. En bie hun t zelfde wie ze os op elektrische fietsen zooge langs kome.

Mer ff truuk noar die huppelbus...n heel rundje doert 2 oer, geregeld make ze pauze en in die twee oer is er amper get te zeen, wat waal fijn is datze uurkes kries en dat ze vertille in het nederlands. Mer doa weersze op n gegeave moment tuureluurs van. Als er weer n heel lang sjtuk kump wo niks te zeen is huursze alein klassieke ‘muziek’ of hea geit om de tied op te vullen vertille wea in Hongarije get heat oetgevonge of weam get gewonne heat op de olympische spele. 

En als er dan n ‘bijzonder’ hoes veurbie keem, bekeeke wea os van huh? Wo den? 

Bus mit de giraffe woor de tweede daag neet op tied, zoog mensen van de organisatie bellen en noa zo’n 3 kwarteer keem dr aan, we houe onger in de bus (zonger airco) nog net n plaats, de rest van t volk moos wachten op n volgende bus. De boottocht zouwe op daag 2 doon, mer noa meer dan n oer wachten keem dea ach neet.

In die twee daag hubbe we de citadell kinne bezichtige en de grote markthal, dus dat woor gein succes. En als we get zoge wat de muite weerd woor houe we gein zin om dan weer meer dan n oer n rundje te maken in de huppelbus in die wermte. 

Budapest hou auch totaal gein sfeer wie paries of Porto, kleuren overwegend grauw en nurgens muziek. Mer good, we hubbe os prima geamuseerd, huppelbus woor n ervaring mer volgende keer toch leever mit de metro/tram zodat we meer in het centrum kooste blieve, en op eigen houtje alles goan doon.

Noa de wermte van 36 graden (de eerste daag), woor t heerlijk ‘toes’ kome bie Ave Natura wat in het bos loog. En auch te meug om verder nog get te doon. We houe Boedapest heel geer in het donker wille zeen, mit name de kettingbrug mot dan prachtig verlicht zeen, mer we houe er gein fut veur om tot saoves doa te blieve.

Noa 3 nachtjes zeen we verder gereist noar Hello Hallo park. 

Ich hou toes alle campings oetgezocht die bienoa allemoal gerund were door nederlanders. Doarnoa zeen we die campings goan markeren op n landkaart van Hongarije zodat we n mooi rundje Hongarije kinne maken.

Hello Hallo park is weer n tussjesjtop veurdat we bie Eldorado kome (de camping wat we hubbe gewonnen). Wat mich hie aantrok is dat er n manege bie woor en dat erbie sjting dat de peerd gear were geknuffeld. Gein probleem, ich offer mich waal op!

Recenties wore wisselend, Paulus zou n miepert zeen, eemis sjreef dat dr commentaar hou gehad omdat dr de douche naat hou achtergeloate. 

Omdat we houe gezag dat we nog neet wooste wie lang we bleeve, mochten wea alein op n veldjes sjtoan dicht bie de poort, mit waal weer als veurdeil dat we n sanitair huuske houe veur os alein. Dat woor super, doa koosze in afwasse, douche en w.c erin.

Mer wie ich mien wasje woor aan t doon keem dr kieke wat ich aan t doon woor. Ik dacht dat er een leiding was gespronge, het water loopt zo lang! Ja doei!! Wiel maakt foto’s van mich mit de peerd ‘ heb je het rolletje nog niet volgeschoten? Kinger reupt dr noa, ruimen jullie wel het speelgoed op? En tot twee keer toe, ik heb liever dat jullie met forinten betalen anders moet ik 5 % commisie betalen aan de bank. Op de website sjtoan alein de pries vermeld in euro’s. Hea is de enige dea gein twee bedragen vermeld. Hea zeat dat dr noar de dagkoers kiekt. Dus bie aafreakene mooste we 5 euro meer betalen volgens de dagkoers veur die twee nachten. Paulus, duudelijk neet mien bloedgroep! 

Wiel hou behoefte aan n tutdaag dus we hubbe t doa rustig aan gedoan. De tweede daag zeen we toch n poging goan wagen om te goan fietsen, wat mer good woor, wat hubbe we genoten. Tot noe toe woor dat echt gein optie, de weag zeen heel sjlecht mit veual koele, Wiel mot zien aandacht er good bie houe en sjlingert zich get eweg rondom die koele. De breidte is net breid genog veur twee auto’s dus n fiets er neave is gein optie. 

Mer Paulus hou n route oetgesjtippeld mit de fiets en ich hou geleaze dat dr veual zonnebloemen wore in dea regio. T landsjap is glooiend vergeliekend mit zuid limburg. Prachtig! En we hubbe nog nooit zoveual velden gezeen mit die geale lachende sjnuutjes. Alsze ze zuus weersze geliek vrolik alsze dat nog neet zous zeen!

En velden mit tarwe of gers? Vreuger zoog ze die in Nuth wo later de flats werde geboewd, we maakte doa kauwgum van. Hie zuusze die nog volop. Echt schitterend. Wiel heat zelfs nog n hert gespot wie we langs n bos fietste. En zo leuk om mooders te zeen eurversjteake mit hur kinger om water oet n pomp te hoale. Ich hou t in t begin neet in de gaten tot Wiel zei zoog ze dat? En op meerdere plekke, echt leuk truuk in de tied ze zeen.

Ich goan sjtoppe, we zeen van de sjnelweag aaf en t rammeld te veual en ich zwiep van links noar rechts. 

Word vervolgd........