Er is er een jarig HOERA HOERA......

N hele hand vol is Zef noe gewore.......alweer vief joar wat geit dea tied toch sjnel veurbie. Vanmurge via n filmke al zeen blieje sjnoet gezeen. 

We hubbe vandaan n fietsdaag ervan gemaakt. 51,3 km in de bein. Kolere, we hubbe n record verbroake! Ich veul t waal aan mien kont! 

We kooste noar 2 plaatse fietse welke toeristisch zoude zeen. Op n kruutsing kooste we of rechtdoor of noar links. Wiel zeat doot mer eerst links want doa likt n camping geliek aan t meer, misjien is dat waal get veur hienoa. Waal n hongaarse camping. De weag kump os bekind veur en wieteweg zeen ich dat we euver n sjpoor motte.

Verrek, dat is t zelfde sjpoor wo we mit de camper euver heen zeen gegoan. T is Wiel nog neet gelukt om dat filmke te downloade. Hea heat mit de camcorder op t desjbord de weag gefilmd noar de camping toe. Mer doa mot nog ingeknipt were anders doert t te lang. En op de ein of angere maneer lukt dat sjteeds neet.

Als ger t filmke zeet, sjnapt ger wat ich bedoel. Noe mooste wea dus wachten om euver dat zelfde sjpoor te fietsen. Neet n sjpoor euver sjteake, nea n paar honderd meater euver t sjpoor fietse en dat sjpoor lupt euver n bruk. En dan kinsze n paar honderd meater gein kant oet als alein rieje of fietse euver t sjpoor wo auch de trein euver geit. 

Ich zik teage Wiel dat doert waal zeker 5 minuten want eerst mooste de auto’s van de angere kant veurbie zeen en dan de trein nog langs en dan wea

Wiel begint te lache, kiek doa noe.....auto’s wore al lang langs en wea mer wachten. Mer doa keem op zien gemakje n fietser aan. Oooohhhhh, dea  moos eerst nog langs, wat good zeat Wiel nog dat dea n oranje vestje aan heat, dat is waal veiliger hie in Hongarije. Mer dea gooje man dea keem noar os toe fietse om door te geave dat wea langs de sjlaagbuim door mochten en euver t sjpoor mochten goan fietse. Huh? 

Okay dan. .....Gaas geave zeat Wiel. Tjuu nea dan sjuut dich vanalles door dea bulles. De auto’s sjtoan netjes achter de sjlaagbuim en wea moge door? Veur t zelfde geld is dea van de opruimdienst.

N goej maneer om die boetelenders op te ruime.....mer dat zou waal neet leuk zeen net op Zef zien verjoardaag wat n herinnering heat dr dan, die zeen dan juus op mien verjoardaag ver(on)ge-lukt!

Kolere, tyfus, glaasgordien, ich hub mich echt die paar honderd meater t leeg oet mien uig gefietst. En mer in de binnesjpegel kieke of de trein er nog neet aan zou kome. En auch nog oplette dat we mit t wiel neet in de rails terecht kome. 

Pffff......dat woor mich waal n avontuurtje, we mooste er alletwee van poepe. Gelukkig wore we bienoa bie de hongaarse camping. Doa zeen we t terein op gefietst, hubbe doa n klein kadootje achter geloate en zeen weer sjnel vertrokke.

Camping woor nieks........

Toen op zeuk noar t meer, dat houwe we gauw gevonge, n piepklein haventje mit get beutjes mer gein kip te bekinne. Hoezo toeristisch? Doa hubbe we get heen en weer gefietst en besloate om dan toch nog mer noar dea angere grotere plaats te fietsen.

We kooste mooi langs t meer fietsen, n prachtig meer mit n omtrek van 120 km mer helemoal leag, af en toe fietse we langs n auto en zoge we get jonges langs de kant vusje . Wie we bie dea grotere plaats aankeme zooge we n poort mit strand erop sjtoan en idd get volk. 

N grote wei, veual werkluuj, n kiosk wat ze aan t boewe wore mer gein reuring. Mer ns noar t centrum gefiets wo toeristinfo sjting. Wiel noar binne want op de deur sjting n bord mit open, mer gein kip te zeen. Wiel get folders mit genome en mer weer noar boete. 

Mer doa kump net n meadje aan gefietst en zet de deur helemoal oape, die is zeker ff aan de jats geweas. Mot kinne. Doe joe spiek ingels? Nooo weet n minut en ze wiest noar boave....

Wea weet n minut en ff later kump n anger meisje de trap aaf gelope en die sjprook waal engels.

Wat bleek....Het is te koud (25 graden) en doarom zuusze nog neet veual volk en ze leepe achter mit alles te instaleren. Mer good dat we ongerweag in n supermert n paar breudjes hubbe gekocht en get boterhamvleisj, ich dacht dat we hie waal urgens kooste lunche. Dat zagte ze al op de camping. Onder de 30 graden is het koud en boave de 30 graden is het zomer!

Mer net als gisteren begint t weer flink te weije, dus we fietse truuk noar ‘hoes’, we goan van middig de tent aafbreake want zoaterdig en zondig zou t flink goan reagene, mer dan goan we erop oet mit de camper.

Grappig, als we toes zeen en de folders bekieke zeen we dat ze get achter ligge. De coupons wat er bie zeen dateert oet 2013!