Richting Oostenriek

We zeen toch langer aan t ballatonmeer gebleven als we gedacht houwe, mer noa n weak (wild geparkeerd) werd t weer tied om verder te goan. Het is noe bienoa 7 oer soaves en we rieje richting Oostenriek en dan verder noar Passau in Duitsland.

We kieke wie fit we dan zeen anders rieje we nog get door.

Ballatonmeer vinge we prachtig. Mit de drukte veel t reuze mit, zelfs in t weekend. Vanmurge zeen we weer vertrokken mit t veer (blieft leuk om mit de camper op de veerboot te sjtoan)om  aan de euverkant te kome, noar Balatonfured.  De filmkes kome nog, we kriege ze neet ge-upload, te langzame wifi.

Ballatonfured is de grootste badplaats van t meer en prachtig aangelag mit n sjtuk boulevard, doa neave n fietspaad en doa neave n prachtig groot park. En natuurlijk de neudige kreuamkes en eettentjes, mer geweun leuk, gezellig. N fijne sfeer hingt er, t is er auch get sjieker, de omgeving oogt sjiek. Hie zeen auch de sjiekere hotels die er prachtig bie ligge. Hie hubbe we meer n vakantiegeveul. In t binneland zuusze gein kip alein ouwe meuk, de natuur is waal mooi, mer wea hubbe toch t water neudig. 

We houe de camper weer geparkeerd bie n grote supermarkt en van doa oet zeen we mit de fiets verder gegoan. In totaal weer 25 km rond gefietst. Heerlijk. T weer blieft de komende daag auch rond de 30 graden en we hubbe de aafgelaupe daag auch gein reage meer gehad gelukkig. Dat goof toch waal stress omdat we mit dat lek zitte. Sjteeds mer oplette dat neet alles zeiknaat werd. We hope dat ze toes in de garage kinne vinge van wo t vandaan kump.

We zeen nog n paar keer mit de kano t meer op geweas en langs de hoeze en appartementen gepeddeld. Er ligge prachtige hoeze mit de vot aan t water, neet normaal n tuin zo groot, sjommelbank erin, zitjes gemaakt, prachtige buim en sjtroeke in de tuin, en natuurlijk n aanlegsteiger bie t water. We keeme ervan aan t kwijle....

Zo n hoes zousze toch motte hubbe als tweede hoes? En mit de wetensjap datse in Hongarije al n hoes kins koupe van 10.000 euro? Dan hubsze waal n groot zjwumbad in diene tuin en in de winter kinsze erop sjaatse. Die hoeze aan t meer zeen waal get duurder......

Gisteren sjtinge we nog mer mit 2 campers op t graasveld, de belgje en wea .....tot we truuk keeme van mit de kano op t water. Trouwens, smurgens zette we vlak veur t meer al n sjtool en t ligbedje onger inne baum , de kano erneave en doa vertoeven we euverdaag lekker mit de e-reader of kiekend euver t prachtige meer. En als we honger houe leepe we ff truuk noar achteren noar os huuske. En als we poem geleage wore ginge we n sjtuk fietse.

 De plek wo we loge woar prachtig. De eerste daag ging ich boete douche in bikini, er neet aan dinkend dat we veurig joar bie decathlon n pomp douche houe gekocht wo 8 liter water in kint. Dus smurgens water erin en soaves ff pompe en we houe lauw water. Tuurlijk is t ff behelpen om doa achter dien camper te sjtoan mer t boete leave heat waal get. 

Mer gistermiddig keem de ein noa de angere camper, busje, auto t veldje opgereje. Mit van die hippies achter t sjtuur, sommige houe nog 3 hung bie zich, en die ginge ff lekker veur os zicht sjtoan.

De bure keeme os al waarsjuwe, hea kalt alein Frans en zie n klein bietje Nederlands en n ienie mienie Duits en de rest mit gebare.

Die keeme truuk van n festival en bleeve hie 2 daag sjtoan en dan ginge ze weer noar t volgende festival. Dus wea dachten, murge ff de hort op! Rond n oer of 12 werde ze  pas wakker, en ginge ze muziek make en zo valsj erbie zinge als n nachtegaal.....s middigs leepe ze al zo zaat als n meleijer rond. Wiel heat er natuurlijk weer niks van mit gekrege, wat n bofkont, dea knikt mit de kop en weg is dr. Ich bin mer opgesjtoan tot t get rustiger werd.

Vanmiddig onger de lunch keem Wiel mit t idee om vanoavend al te vertrekken ipv murgeaovend. Murge zouwe we nog als afsluiting n daag mit de kano t water op goan.

Mer dat beteikende dat we of tussje die rasta hoare jeugd mooste goan zitte of n angere plek zeuke en weer mit t veer noar de euverkant goan. En murge oavend weer truuk, anders mooste we omrieje.

Eigelijk waal n good idee.......we hubbe ongertussje al n koffiepauze erop zitte en bie n tankstation veur de grens in vignet gekocht veur in Oostenriek te kinne rieje.

De grens zeen we gepasseerd, dat is altied ff sjpannend of we er neet tussje oet were gepikt omdat we natuurlijk euver lade zeen en de boetes zeen neet mis.

Er is doa sjtrenge controle en veur os werde 2 auto’s noar de kant gesjtuurd. Ich trok mien onsjuldigste gezicht op en we kooste door. Ich num aan dat Wiel t zelfde heat gedoan.....

Mer n sjtuk verder t zelfde riedeltje opnuuj werd gekeke, gekeurd en auto’s veur os noar de kant geweze. 

Dus dat woor os Hongarije avontuur. Kome we nog ns truuk? Noar t ballatonmeer zeker en dan weer lekker wild parkeren en dan in combinatie mit n anger land.